Fa poco he puesto colaborar con un prochecto muit pincho. A “casa caída” ye una visualización de datos de Jorge Aznar, una faineta voluntaria feita con prou talento. En ella podetz veyer a evolución d’a población aragonesa por provincias y por municipios, y tamién observar graficament o peso d’a población mas gran (+65) y mas choven (-18). Amás amás, fa una lectura novedosa d’a visualización, metendo-le letras de mosica d’o país que ilustra los datos: la Ronda de Boltaña, Más Birras y Azero.
Jorge Aznar tamién fa otra mena de visualizacions, como por eixemplo “Forno”, en do amuestra lo proceso de cambio climatico en a ciudat de Zaragoza, u tamién “Bislai” en do fa un seguimiento d’as votacions d’os grupos politicos en o concello d’a capital aragonesa.
Ye un goyo poder colaborar con personas que fan un triballo tant mahet y moderno. Vos deixo con o chicot texto que he escrito pa la ocasión, explicando qué claus me pienso que hemos de tocar en a luita por a repoblación, como ya somos fendo en Artieda (Viello Aragón) u como son fendo en atros lugars, como Allepuz (Mayestrato).
¿QUÉ PODEMOS FER?
“En o sieglo XXI, por primera vegada en a historia d’a humanidat, mas d’a metat d’a población mundial vive en as ciudatz, mientres que la resta d’o territorio tiende a perder peso poblacional, pero tamién politico y economico. Este proceso responde a la lochica de l’acumulación de “capital” humano en poco espacio.
En Aragón esta realidat tamién s’ha dau dende prencipios d’o sieglo pasau, observando-se d’una forma muit grafica como la mayoría d’a nuestra población se’n iba enta las ciudatz, mas que mas enta la nuestra capital, sumiendo a la mayoría d’as comarcas en una dinamica negativa.
Pa treballar a favor d’a revitalización d’os nuestros lugars y comarcas ye esencial entender que toda solución ha de naixer d’o motor d’as personas, empresas, colectivos y asociacions d’o territorio, y ha de contar con a complicidat y l’emparo d’as diferents institucions publicas. Ye menister organizar y coordinar los esfuerzos en una dinamica positiva, mirando estratechias a meyo y a largo plazo.
Amás, s’ha de fomentar unos lugars atractivos pa la chovenalla y especialment pa las mullers chovens. Traspasar lo liderazgo d’os prochectos a la chent choven y chenerar enradigamiento nos permite fer atractivas las comarcas. La luita por la repoblación ha de tener un enfoque integral, chenerando las condicions propicias pa un buen vivir en os nuestros lugars, fomentando l’acceso a un triballo y una vivienda dignas, l’acceso a una socialización y unos servicios de calidat y lo reparto equitativo d’os cudiaus que nos fan falta a todas las personas a lo largo d’a nuestra vida. En definitiva, ye necesaria la redistribución d’a riqueza y d’as decisions en o territorio y lo fomento d’o buen vivir.”
Deja un comentario